法拉现在很幸福。身处美国修读戏剧的陈法拉，今年系最后一年。依家佢主要都系排练同演舞台剧，依家做紧一个，嚟紧十一月同明年二月又有两齣，忙得不可开交，如果大家咁岩喺当地，仲可以购买门票入场欣赏法拉与同学嘅演出。

香港时间今日凌晨，放低剧本嘅法拉应邀出席Kate Spade 2018年春夏时装展，一身红色lace裙配杏色大褸，佢笑笑口话系「偷走出嚟」睇靚衫做大人，其间又与拍过美剧《白宫风云》（The West Wing）及《广告狂人》（Mad Men）嘅女星Elisabeth Moss合照，法拉话：「好开心见到Elisabeth，佢今年套《The Handmaid's Tale》系我最钟意嘅电视剧之一，佢仲有问我喺Juilliard School读书嘅情况。」

今次Kate Spade春夏系列以「Road Trip」為主题，好钟意自驾游嘅法拉话今年已经去左两次road trip，其中一次仲系同男朋友、曾任外交官嘅法籍型男司马诺（Emmanuel Straschnov）一齐去。「一次系我做司机，6月同屋企人去左加拿大6日。山区啲路唔易揸，加上一家大细，我系完全唔敢睇风景，专心揸车。」

第二次呢，就系同男朋友一齐去。「同男朋友去法国，今次佢做柴可夫，我可以专心欣赏郊外景色。」法拉话此行仲特登去当地乡村為其执导嘅短片取景，所以多得男朋友做司机，令佢可以专注做好导演工作。

法拉仲话，今年圣诞会返港，仲话好掛住香港嘅一切。