愛不疚，有老公錫就已足夠。

角色名容易入屋，就好似「海潮」等於溫碧霞、「初哥哥、Cool魔」等於張智霖、「阿燦」等於廖偉雄……到今時今日，就有大小姐「龍力蓮」同林淑敏密不可分，就好似碧咸同七旋斬、羅拔唐尼同鐵甲奇俠一樣唇亡齒寒。

入行16年的林淑敏演過無數路人甲乙丙同阿媽角色，加上做《都市閒情》主持，佢個樣入晒腦但噏唔出佢個名。直到「大小姐」上身，呢個強勢兼麻煩，跟潛藏性格相反嘅女上司，唔經唔覺令林淑敏個名成功入屋。大小姐有別於「細契」關菊英、「萬貴妃」車婉婉呢啲巴渣角色，因為大小姐夠貼地、夠人性化，觀眾會諗：「係喎！我公司個女魔頭都係咁Ｘ煩，但佢係慘嘅，冇人敢要！」

乾坤挪移 愈難愈愛

女上司份人工包埋演戲，你總要有啲巴渣、強勢同硬淨。人前女權顯威風，人後寂寞背人垂淚，林淑敏未至於演得淋漓盡致，但確實將大小姐變成一個有血有肉嘅人，大小姐愛下屬送水輝，完美演繹可能永遠係最遙遠的距離，連Nuts哥都真係睇到眼濕濕。

女強人都係女人，都希望搵番個男人。現實中林淑敏同大小姐恰巧180度大挪移，因為佢可以搵到一生中最愛。2010年，林淑敏不幸患上乳癌，一夜晴天霹靂，為咗唔想拖累當時仍係男友嘅Tommy，更一度勸走對方，但Tommy冇話因為女友患癌間隔着距離，無懼世事變改，實行愈難愈愛。

「大小姐」林淑敏與「送水輝」許家傑好戲連場。

抗癌路絕不易走，一夜脫盡青絲事小，心靈意志體力耗盡先最摧心折骨，Tommy不離不棄，一直在旁悉心照顧同支持。2013年佢哋終於步入教堂，婚禮冇搞大龍鳳，只有我和你，簡簡單單你的名字我的姓氏。有人話一個家要生小朋友先夠完整，林淑敏想生B，但原來只係自己想太多，Tommy認為一個完整嘅家，就算只得兩個人都已經好開心。

權衡利弊 只怕萬一

其實林淑敏一位閨蜜同Nuts哥講過，佢做咗幾年荷爾蒙治療，醫生見佢身體狀況唔錯，都有鼓勵佢生B，但林淑敏認為自己年紀漸大，冇足夠精力去照顧小朋友，亦未知身體之後會出現乜嘢變化，如果出現萬一，對BB同老公嚟講都會好慘，權衡各種利弊，最終放棄生小朋友念頭。話雖如此，林淑敏一生最大遺憾，正正係未能生兒育女。

林淑敏一生遺憾嘅可能就係冇生B。

大小姐與林淑敏密不可分，偏偏佢哋係兩類人，亦係同一個體。有人渴望去愛，有人祈求被愛。儘管大小姐煉成林淑敏人氣，但林淑敏遠比大小姐幸運，因為有人去愛，不是嗎？