郭可盈一家三口晒天伦乐

艺人郭可盈不时都喺网上分享亲子乐嘅相，一班网民隔住Mon都感受到佢哋几咁幸福满泻！呢日可盈就同老公林文龙同囡囡林天若（津津）一齐去沙滩，见到文龙拖住津津漫步沙滩，又陪佢一齐堆沙，果然系廿四孝爸爸，而可盈就喺旁边帮佢两父女影相，仲帮老公影chok爆甫士相，留言：「海风轻轻、阳光悠悠、秋风送爽！」随后，文龙亦都喺网上晒出太太同津津合照，见到佢哋笑得咁开心，难怪网民都留言话幸福就系咁简单呀～

见埋家长先公开？刘佩玥自爆同周志文关系

艺人刘佩玥在油塘为无线新剧《跳跃生命线》宣传。她早前被指与绯闻男友周志文（阿文）游船河时，于浮床激咀，似是恋情浮面。一直没有回应的她否认说：「我觉得系角度问题，嗰个系我同阿文嚟嘅，我又唔系好惊回唔回应、只系想低调处理。讲番件事，我自己又唔系好蠢嘅，都知道嗰日开Happy Live，咁又点会做啲咁样嘅嘢呢，唔使将件事放大。（低调处理恋情？）唔需要用一个娱乐嘅角度去回应，低调亦唔等于系隐瞒。（系咪拍拖？）我只可以话我哋嘅关系友好、好Friend，成日畀人话我身边男仔朋友系兵，佢唔系兵，佢系我好好嘅朋友，女仔同男仔做Friend都唔系好怪嘅事。（点解要咁低调拍拖？）唔系，系唔使同所有人公开身边人嘅关系，唔想工作同访问每一次都讲呢啲嘢，如果系拍拖，好稳定，有感情基础先公布，我对关系好认真，同咗父母讲先再同大家讲。（见家长未？）冇呀，拜年先再考虑。」她又透露近日与周志文及友人也继续有相约去沙滩玩。

陈庭欣近日回应刘佩玥与周志文恋情似默认两人拍拖，随后刘佩玥在社交网发表「小人论」疑似对陈庭欣不满，她说：「大家谂多咗，我有留意佢回应，如果系我会叫记者问番当事人，我嘅说话唔系针对佢，但系有啲人锺意道听途说，我只系抱不平去讲。（陈庭欣多口？）每个人都有发言权，我尊重嘅，我哋亦系好朋友。」

钱嘉乐出钱搞电影慈善场　观众感动落泪

电影《黄金兄弟》的导演钱嘉乐，昨日自掏腰包举行一场慈善特别场，邀请癌症信息网cancerinformation.com.hk及龙耳Silence两个机构的朋友来欣赏电影！嘉乐与太太汤盈盈及好兄弟郑伊健亦亲身到场致谢，又与观众一齐分享观后感，现场有手语专人代为解释，有不少观众被这部戏的感人情节打动！

在分享交流期间有观众被剧情感动得热泪盈眶，嘉乐表示，希望有正面讯息带给大家及享到看戏的乐趣，而伊健则希望大家看到香港电影的进步！

凌晨走火警　胡鸿钧朱智贤狼狈逃生

歌手胡鸿钧（Hubert）最近忙于为主演新剧《救妻同学会》开工，前日凌晨佢同刘温馨、朱智贤及蔚雨芯（Rainky）等喺新蒲岗一工厦拍摄，期间大厦意外发生火警，由于事出突然，据知当时各人非常狼狈、慌乱，朱智贤更一以身睡衣打扮走火警，幸好大家都顺利逃离现场。

事后各人都有喺社交网甫出现场照片，并发文报平安，其中Rainky喺留言交代走火警嘅情形，佢指：「我同温馨嗰间房搭好咗个景，佢一路同我讲好大阵味，我话有咩？装修味？佢顶唔顺行番出去化妆嗰个位，之后唔使10分钟就叫走火警，我还在自己新厂景的床睡觉，好彩其中一个工人员叫醒我。」

媒体联络到刘温馨，佢表示：「好惊呀！好在啲火好快熄灭，如果唔系，我哋喺楼上嘅景、拍摄器材呀，服装等等就可能被毁灭晒喇。」

头贴头放闪！卓林Andi疑半裸自拍任人睇

艺人吴绮莉女儿吴卓林嘅女友Andi近月开始疯狂玩社交网，二人频频放闪，身在加拿大嘅二人虽然自爆冇钱又冇地方住，不过佢哋最近开埋公司，又亲身上阵影Demo product相，似乎都已经有一定收入维生，今日Andi仲upload咗几张佢哋出街玩嘅合照添。

早前佢哋忽然晒疑似半裸嘅自拍照，二人揽头揽颈Chok到爆，今次佢哋就着番衫出街街，染晒少蓝色「情侣头」，加埋一身情侣装，而卓林仲好冧猪咁挨实Andi嚟个头贴头，真系闪到爆！

周柏豪做后空翻出意外险爆头：差啲天国见

歌手周柏豪出席无线《星光熠熠耀保良》直播节目，刚完成巡回演唱会中山站的他表示凌晨4时才回港，马上就要到红馆彩排：「都有啲攰，等阵要开吓声。」又自爆于第十场巡演上海站发生惊险事，彩排做后空翻动作时差点头先着地：「好彩有条带拉起我，如果唔系（个头）直接落地，就返唔到嚟香港，就天国㗎啦！之前拍戏太攰，每日真系Chur到尽，同埋觉得之前九场都打到，到第十场个心理质素就松懈咗，练少咗，到中山站都的起自己一定要做，要报仇！所以最后做到呢个动作大家都好戥我开心，有足够时间休息就做到，我系唔会畀自己衰退。」

柏豪表示现时剩下4场巡演，接下来亦要去横店拍内地电影：「之后返嚟再同阿Sa（蔡卓妍）开戏。（又赚多层豪宅？）希望系啦！依家啲楼价都回落咗少少。（有心水物业？）度度都系心水。」续坦言今年所有事都好顺利，工作机会多咗之余人工又加咗，都想给家人更好生活。

张卫健唔使灰！洪永城爆《大帅哥》重见天日

由艺人张卫健回巢孭飞嘅无线剧《大帅哥》，有传原来安排做台庆剧但临时被抽飞，又有传因为剧中演员形象问题已被雪，谣言满天飞。不过呢日有份参演嘅艺人洪永城（Tony），就率先爆料指《大帅哥》终于「重见天日」啦！佢喺社交网上载一张剧照，仲代入剧中角色嘅身份公布呢个喜讯，佢留言提到：「马炭：『大哥呀，究竟几时播呀？出边（面）好多谣言啊，又话呢样又话嗰样……』大帅哥：『嘈嘈嘈唔好嘈，其他人道听途说，你就要跟佢哋嘅咩？！后生仔唔使急，好嘢系值得等待，准备好12月见啦。』」消息一出，网友即反应热烈，纷纷表示期待剧集出街。