效力無綫48年　

李添勝退休講明要Hea

效力無綫近半個世紀的著名監製李添勝在尖沙咀筵開22席舉行榮休晚宴。李添勝在無綫開台年多，於1969年5月1日加入綫，效力48年，他表示：「離開一定唔捨得，但人始終要退落嚟，因為體能出咗問題，膝頭哥痛，尾龍骨亦有一節走位，企得耐會腳痺。」李添勝表示自己退休後會在屋企種菜、湊孫及去游水做運動，相信日子不會難過。

讚舊時人才鼎盛

經典作品無數的李添勝表示滿意的作品包括《火鳳凰》、《楚漢驕雄》、《鐵血保鏢》、《網中人》及《親情》，最近再看重播的《鹿鼎記》又覺得幾得意，他說：「再拍都搵唔番嗰兩個，後面啲陣容都犀利，當時真係人才鼎盛。（依家冇咁多人才？）冇辦法。（有冇請梁朝偉嚟？）今晚冇特別邀請邊個，邊個想嚟就嚟，公司都問過我搞唔搞退休宴，自己唔想搞，覺得退休係小事一則。」

講到合作最深印象的演員，李添勝表示周潤發及鄭裕玲，他說：「咁出色嘅演員真係唔多。（會唔會約周潤發行山？）我都知佢鍾意行山，自己都會Hea吓，呢幾十年都未Hea過。」

劉梅重返無綫　曾勵珍唔介意平起平坐

無綫高層曾勵珍晚上出席監製李添勝榮休晚宴，她表示李添勝看着她入行是前輩，大家共事多年，雖然從未在同一劇集合作，但在他身上學到很多，曾勵珍說：「佢做人好正路，做嘢唔會走捷徑，好實幹，對我哋影響好大，訓練到個風氣係咁，希望承傳落去。佢亦將人生最黃金、最有活力嘅時間貢獻咗畀公司。」

講到劉家豪與梅小青重返無綫擔任戲劇製作總監，曾勵珍表示：「好多出咗去嘅都返番嚟，唔需要覺得奇怪，公司OTT平台發展好大，好需要台前幕後，多個人多對手。（佢哋同你平起平坐？）冇所謂，做嘢各有各做，唔係得把口講，係睇作品嘅。同老闆講淨係畀將寫字枱我都做到，做唔到畀2000尺Office你都冇用，做嘢唔係講職級。（工作上有冇變動？ ）冇任何變動，加加埋埋八百幾小時製作，一個人邊度做得晒咁多嘢，OTT平台又要拍需要額外人手，依家都睇緊啲以前同事，搵佢哋返嚟幫手。

鄧萃雯同李添勝合作全靠一支煙

鄧萃雯晚上到尖沙咀出席李添勝榮休晚宴。鄧萃雯與李添勝合作打造經典劇《巾幗梟雄》及《巾幗梟雄之義海豪情》，劇集亦造就她事業登上高峰，原來促成合作全憑短短一支煙的時間，鄧萃雯謂：「由細到大睇好多添哥嘅劇《火鳯凰》、《網中人》，但係《巾幗梟雄》之前冇機會合作，嗰陣聽聞佢就退休，人生唔可以有遺憾，有次見到添哥食煙，就走埋去同佢講你退休之前一定要搵我拍劇，真係好多謝呢支煙，3日之後添哥就打畀我，我就話可唔可以搵埋黎耀祥，最後如願以償，添哥就好似我嘅神仙棒將我嘅夢想變成真，好感激佢，事前冇諗過咁成功，件事係互相成就，係一件意外成功，好美麗嘅事。」

大讚李添勝人好

鄧萃雯準備了禮物送給李添勝榮休，她說：「希望佢第日喺屋企睇到呢幾個字會覺得好安慰，添哥係一個好好嘅人，好有心有力嘅製作人，好為同事設想，佢會特登用一啲唔夠show嘅同事，我好敬佩佢，希望佢嘅精神永遠都留喺度。」

胡定欣讚李添勝玩得又健談

「視后」胡定欣與李添勝合作過經典劇《巾幗梟雄》及《巾幗梟雄之義海豪情》，晚上她到尖沙咀出席李添勝榮休晚宴，胡定欣表示：「入行時拍過添哥嘅《搜神傳》，好彩後來有份參與《巾幗梟雄》、《巾幗梟雄之義海豪情》，佢喺行內舉足輕重嘅監製。對添哥最深印象係佢一有煩惱就會不停『R』頭，外人唔認識添哥以為佢好嚴肅，但其實添哥係好玩得、好健談。」