强台风「山竹」吹袭，威力劲到不得了，即使做足防风措施都搞唔掂！好似李治廷咁，佢话屋企嘅玻璃门嘅门槛都被吹烂咗，佢要自己撑住个玻璃门，佢喺社交网话：「感觉山竹正在离开香港但威力还是好强。玻璃门的门槛已经被吹破了。不撑著（着）感觉随时会塌陷……大家一定要注意安全，做好安全措施！…我怎么感觉这画面似曾相识。」佢讲紧嘅似曾相识相信就系佢8年前有份出演电影《岁月神偷》嘅情节喇，因为当中有场高潮戏，就系十号风球下，罗记一家人拉住个屋顶，话要「最紧要保住个顶」呀！

随后，佢仲上载一段自拍片边拍边讲家中出面嘅情况，不过唔少网民就将个重点放喺佢屋企，话佢豪宅曝光，睇到佢影到屋企唔同角落，都觉得大到不得了呀！

 阿Sa 

艺人蔡卓妍（阿Sa）喺社交网上载咗一段短片，喺屋内避风嘅佢影住出面露台嘅情况，见有部分盆栽已被吹倒喺地上，阿Sa仲留言表示：「好大风呀妈咪，只窗不停Bom bom声，窗缝不停foo foo声，令我谂起『咆哮山庄』，大家记得留喺室内呀！！安全安全」佢仲话屋企嘅胶纸用晒，所以惟有顶住先。唔少网民都留言叫佢小心，而吴日言就笑指：「张胶纸好似弱咗啲。」

艺人森美受「山竹」影响，工作首当其冲，原定晚上接了婚礼司仪骚的他，现在连家门也不能踏出半步，他说：「同主人家讲咗，除非安全情况下，我会去，否则冇办法。」他说家外走廊玻璃也爆了，无法出门，放在露台的小雪柜也被吹跌，幸未有撞破露台玻璃，他趁风势稍弱时，急急将雪柜移回室内。