冇错，就係唱《你瞒我瞒》《永久保存》嘅陈柏宇，佢话要退出乐坛。

原因係于今年7月即将同女朋友符晓薇拉埋天窗，依家忙紧筹备婚礼。

仲话现时目标係要结婚生B，更坦言，之后可能唔会再唱歌，要以家庭为重。

陈柏宇同女朋友嘅恋情，简直羡煞旁人，拍咗拖5年几，感情十分稳定，时不时都会係网上晒。

佢话女朋友改变咗佢唔少谂法，比如係帮人方面。

以前佢会拣谂值唔值得先再帮，依家係帮咗先算，有问题再谂下点解决。

虽然两个人都会有吵架嘅时候，但係通常陈柏宇，都会尊重佢，唔会同佢吵架，会花时间同埋用诚意去氹佢。

无知无觉，陈柏宇原来已经出道咗11年，去年更加被封为“隐世高手”！

係“高手”但“隐世”，即係话“红唔起身的实力派歌手”。

对于天王般的成就，佢唔会奋力追求。所以，有唔少FANS都替佢觉得唔抵。

真係“皇帝唔急，太监急”，佢自己就冇谂咁多，人气高低，睇得好淡。

被封为“隐世高手”嘅佢，表示唔敢当，佢唔觉得自己有几高。

“我係一个严于律己嘅人，认为可以做得更好，至于隐世，我冇刻意低调，又冇奋力追求。”

“有新歌出，曝光率自然就高，冇歌咪就隐世咯，我唔接job做，又唔会催公司帮我安排。”

原来“隐世”嘅佢，其实都好忙。

发展下其他兴趣或者自我增值，做运动、打高尔夫，又或者係打机，佢都觉得好开心。

而且佢用依啲时间，去学弹吉他，又不断健身，练肌肉，想做“大只佬”，总之佢一直都自我增值紧，冇停过。

但係不进则退，係娱乐圈嘅潜规则，隐世之后，係咪就会消失係大家嘅视线？

答案係NO！陈柏宇并唔在乎是否受欢迎，是否要名利双收，佢通通都睇得好淡。

皆因佢心态够好，佢觉得自己最好嘅地方，唔係唱功，而係佢嘅乐观！唔会太过执着于令自己不快乐嘅事。

“懒理姓甚名谁，难敌到最高就会倒退”可能就係佢嘅心境吧。

明明陈柏宇有机会可以更上一步，但係佢就选择“海阔天空”。

对于佢嚟讲，事业从来都唔係佢嘅全部，家庭、爱情，甚至係兴趣爱好...都值得佢花时间。

其实每个人都有一份职业，而佢自己认为歌手都只不过係一份工作，工作以外就应该过翻啲普通人生活，难怪佢唔想做天王。

做得天王，好似郭富城、黎明咁，去到边都引人注目，冇咩私隐，而且戴住天王嘅光环，都会係一种负担。

“悬崖上我都要企得稳”，就算冇大雄图冇能力改变世界，陈柏宇甘愿做一个只养家嘅快乐歌手。

讲到佢歌手嘅身份，相信最为人熟知应该係《你瞒我瞒》，想当年，係去KTV必点歌曲之一，而佢亦都凭借首歌获得第三十二届“十大中文金曲颁奖音乐会”嘅第3首金曲奖。

有唔少网民认为，陈柏宇係香港乐坛嘅一股清流。

据说林夕曾经评价过佢，认为周柏豪同洪卓立嘅唱功加起身都唔及佢嘅三分之一。

其实随随便便打开佢嘅一首歌，只要一听到把声，就会觉得好舒服，好想单曲循环。

而且陈柏宇唱歌有属于自己的独特风格，唔係随波逐流嘅类型，从《你瞒我瞒》到《i miss you》嘅苦情歌，都可以令到听嘅人，感同身受。

相信陈柏宇有“陪伴”大家经历失恋，走出困境，佢劝大家《断绝来往》，但係又忍唔住《回眸一笑》，《原谅我怕黑》。依家佢终于唔再《你瞒我瞒》，而係《没有你，我什么都不是》。

咁大家只好祝福陈柏宇做一个尽职尽责嘅人夫同好爸爸！唔好辜负大家嘅期待。

多谢你，陈柏宇！

继续向梦想出发，寻找奇妙生命的意义。期望你退出歌坛之前，再令大家感受你嘅歌喉。