组合Twins出身嘅锺欣潼（阿娇）同好姊妹蔡卓妍（阿Sa）一出道就大红大紫，唱尽少女心声，绝对系非常成功嘅组合，不过其实阿娇并冇谂过入娱乐圈！佢喺大陆综艺节目《举杯呵呵喝》中，同主持们边食嘢边倾偈，吐尽心声。

从未想过入行

阿娇坦言当初入行系因为“要养家”：“希望我家人可以过得好！”当被问到“不是自己喜欢吗？”阿娇拧晒头表示：“我从来未想过进这一行！”佢又觉得自己性格唔适合做呢行，不过其实好锺意演戏。佢仲道出童年悲伤经历，因为单亲家庭出身，住喺唔同屋企到处漂泊，由幼稚园到小学转咗7间学校，根本交唔到朋友，唔识同人沟通，而且身边女比男多，所以一入行好怕同男仔讲嘢，好怕丑！

希望有个开心童年

虽然阿娇如今事业爱情得意，不过佢其实有一件憾事，如果能够重回二十年前，佢都愿意：“就是从头再成长过，我就好像没有童年一样，我就希望有一个开心的童年。”令在场人士都非常心痛！而佢又坦言好想做妈妈，希望孩子有个快乐童年！

哽咽讲爷爷

讲起家庭，阿娇又透露有个细16年嘅妹，系后父生，不过妹妹唔敢同佢讲嘢，两姊妹有啲距离！而被问到电话最唔舍得删除嘅照片时，阿娇就展示佢同爷爷旧照，佢讲到当时冇花更多时间陪爷爷，更一度哽咽眼湿湿！

霸气做自己

而组合就自然有比较，讲到负评畀人话佢得个“靓”字，情绪智商低，阿娇停一停霸气咁话：“我情商低又怎样？我就是要做回我自己！觉得我笨我蠢，我就是这样呀！”人前风光背后辛酸，其实阿娇一路走来都唔易！