胡定欣喺情人節前夕於IG上載一張捧住花嘅相，寫住話：「我並不是第一次收花，但今晚收花的感受令我永記在心，多謝您! Happy Valentine’s Day!」仲喺限時動態上PO了一條短片，大賣關子咁話：「今日難得有呢個機會慶祝情人節，究竟我今晚同邊個食飯？」令唔少粉絲都猜想定欣係咪有新戀情呢？

定欣於情人節前夕收花，仲話呢紮花令佢永記於心。(IG圖片)

答案終於喺情人節當日揭曉，原來佢當晚係同成班好朋友過，包括豹哥單立文、豹嫂胡蓓蔚，仲有黃智雯、山聰及女朋友Apple等，而定欣紮花就係豹哥送嘅，佢仲好有心思咁整咗張卡俾定欣：「你係我前世情人，老豆今年就幫你個今世情人送一次花，你搵到佢就幫我收返錢…」

原來紮花係豹哥單立文送的。(IG圖片)

豹哥唔只送花，仲有心意卡，順便向定欣未來男朋友追數。(IG圖片)

點解成班人食飯，零零舍舍得定欣有花收？因為在場個個都有另一半過情人節，得定欣單身，而琴晚《愛·回家之開心速遞》嘅〈前世情人節〉，又咁啱係講全世界有拖拍，得呂慧儀飾演嘅熊若水落單，所以爸爸劉丹就送咗花俾個女，話若水係佢嘅前世情人，同定欣以父女相稱嘅豹哥，可能因此受到啟發，所以就送花氹佢開心。

定欣同成班女友情人節前夕聚餐，但個個都有拖拍，得佢落單，所以豹哥以前世情人名義送花俾佢。（IG圖片)

定欣收到花好感動，佢以為紮花係豹哥送俾豹嫂的：「你的心意，已經深深印在心中!佢話.：『 無人錫你，我錫你! 』我以為呢束花係送畀佢老婆，原來佢一早已經打算送花畀我，希望我開心!」佢仲提醒未來情人，記得要找數畀豹哥，希望豹哥可以早日收返啲買花錢啦！