艺人黄宗泽（Bosco）早前拍摄邵氏网剧《飞虎之雷霆极战》时整伤左脚，虽然日前已经复工，但都仲要包住石膏同撑拐杖，而因为Bosco行动不便，所以部分动作戏由替身拍，之后再补佢嘅上身近镜。咪以为听落好轻松呀，其实咁样反而系演技大挑战！

“我真系唔识演”

呢日Bosco就喺社交网分享咗段拍摄花絮，见佢神色凝重咁坐咗喺度，由工作人员推嚟“行”，Bosco个膊头仲郁吓郁吓咁，但拍拍吓就忍唔住大笑！到底做紧咩呢？佢就留言解画：“导演，一个不良于行嘅人，点样好急咁行？我真系唔识演！”佢嘅爆笑演出令黄翠如、郑希怡等艺人朋友都留咗啲笑到喊嘅emoji公仔，更有网友话“笑到有腹肌”、“睇咗十次仲笑得出”。不过亦有网友话其实遮住一半画面，净系睇上半身都真系劲似好急咁行，大赞Bosco好戏呀！

今日Bosco再更新社交网，分享咗一张同苗侨伟（三哥）嘅自拍，仲留言话2019年第一张selfie，当然要同佢最爱嘅三哥影。咁识卖口乖，真系抵三哥咁锡佢呀！