【on.cc东网专讯】 欧阳震华（Bobby）的剧集為观眾带来不少欢乐，但拍剧开工，一连数个月日以继夜忙不停，有时连乐观的他也感困惑。今次与比他更烂玩的「老友记」胡枫合作，就令他有所啟发，学懂一套「游乐场」快乐哲学。
冇乜钱使...所以可以好瀟洒
「之前睇《赢在起跑线？》，见到啲妈咪同细路好大压力，有个家长话香港只有两种人可以瀟洒，一係冇楼，一係冇小朋友，因為有楼就畀层楼绑住，有小朋友就畀个社会绑住，我两样都冇，冇经济负担，又有地方住，咁我就可以瀟洒喇！
我嘅生活好简单，一日几餐都食得好简单，唔使餐餐都食好嘢嘅，好嘢多数有人请，哈哈！匿喺屋企咸鱼青菜都冇所谓，又冇乜钱使，係有时买吓玩具，四个轆玩吓款，咁又唔係要买啲几百万嘅车，有啱先换，都係有限钱。不过，近年去多咗旅行，以前后生冇经济能力嘛！不过想去嘅地方都去咗，我又畏高呢！好怕搭太长途嘅飞机，近年都係钟意去近近哋嘅地方，唔好太远，4、5个鐘头机就最好，尤其係台湾，一年去几次，去食吓嘢、按摩、瞓吓觉休息吓，台湾应该搵我做旅游大使啦！」
珍惜旧物...唔係旧嘅就唔好
爱玩的Bobby遇上比他更烂玩的「老友记」胡枫（修哥），有时亦难以招架！不过，由胡枫身上却学到一套「游乐场」开工哲学，对Bobby大有啟发。
「平时见我对住镜头好开心，但有时拍几个月戏，日日要返工，其实都好攰、好想抖吓，係心情同思想嘅问题，都会斗争得好紧要。我请教过修哥呢个问题，修哥咁嘅年纪，有孙、有塞，唔使忧柴忧米，我问佢用咩心情返工，佢话当自己係小朋友去游乐场，好似返嚟玩咁。我问佢有冇諗过退休，佢话唔会，退休好快死(口架)！修哥就係用呢种心态做嘢，有人畀埋钱你去玩喎！几开心呢！我都开始转变，用修哥呢种游乐场心态去做嘢。
修哥开工嗰阵烂玩过我，佢虽然八十几岁，但脑筋好清晰、好灵活，有时佢一句窒埋嚟，连我都唔知点答。最搞笑係佢开工嘅时候，钟意周围摄啲睇完嘅剧本！佢开工净係带嗰日嘅剧本，一路拍一路撕，然后周围摄，初时好多地方可以摄(口架)，但拍到后尾，大家发觉个厂都係修哥睇完嘅剧本。
修哥成日见我拎住个铁箱，笑我『咁重，你睇吓我几轻便』，其实个箱跟咗我十几年，用嚟装剧本、化妆袋，仲可以装两对鞋，等埋位又可以坐，依家冇出咁笨重嘅款，当做运动囉！呢啲箱愈旧愈靚，嘢唔係旧就唔好，有时旧仲好过新。」
睇老戏骨...睇嘅係人生阅歷
去年拍《一屋老友记》时，Bobby已贴胡定欣做「视后」，可见他眼光独到。剧集收视好除了演员合拍，Bobby认為现时的观眾特别喜欢欣赏老戏骨散发的人生阅歷。
「同胡定欣识咗好多年，最记得第一次同佢倾偈，佢喺停车场问我借『过江龙』，因為佢架车冇晒电，嗰阵佢仲係小妹妹，估唔到依家可以做拍档，我停咗喺度等咗佢好耐，终於等到佢，哈哈！好多人都问我收视有冇压力，冇(口架)！拍咗就算，做咗我本分，庆幸套剧收视都见得人。其实依家啲剧唔係净係睇收视，因為太多途径去睇，讲口碑最直接，我都有睇《纯属意外》，几好睇喎！依家香港啲观眾唔係唔睇剧，係会拣人睇，钟意睇啲有人生阅歷嘅老戏骨，好似修哥、啟华、我都算係嘅，睇戏其实係睇呢班人嘅人生阅歷。」
后记：
经常见Bobby着阔浪裤，原来他是阔浪裤的忠实拥躉，喜欢它舒服、易穿、容易配衬，着过后便上癮。Bobby每次到台湾，也会到一间专卖阔浪裤的舖头扫货，有次更扫齐舖内所有款式，认真夸张！
场地：Coast Seafood & Grill（铜锣湾）
寄工作於娱乐，好嘢！
欧阳震华话呢种心态係跟胡枫学嘅。
「有人畀钱你去玩喎！几开心呢！」，又好似係。
吕理新定旧，啱用就得啦。
Bobby係好嘢嘅！
欧阳震华
欧阳震华
Bobby从修哥身上学懂一套游乐场哲学，以玩乐心态返工减压。
年前昏迷入院的Bobby，死过翻生后放慢脚步，多抽时间与太太享受人生。
胡定欣（右）
感谢您的支持鼓励，我会继续努力的!
文章地址：
用户邮箱：
打赏金额：USDT
点击”去打赏“，即可进行打赏支持本文章哦
